Ճանաչենք մեր մեծերին


 





Ս.թ. սեպտմբերի 24-ին, ժամը 14:00-ին, Ավ. Իսահակյանի տուն-թանգարանը    (Զարոբյան 20) սկսում է նոր կրթական ծրագիր «Ճանաչենք մեր մեծերին» խորագրով:
Ծրագիրը նպատակ ունի լուսաբանել, հանրահռչակել հայ նշանավոր, անվանի գործիչների կյանքի ու գործունեության ազգանվեր և հիշարժան դրվագները, որոնք պիտի կրթեն ու դաստիարակեն երիտասարդներին, հնարավորություն տան ճանաչել, սիրել, մեծարել և հպարտանալ մեր մեծերով, նրանց օրինակով դաստիարակել հայրենասիրություն:
Այս տարի, օգոստոսին լրացավ անվանի գրականագետ, մանկավարժ Նիկոլ Աղբալյանի մահվան 70 ամյակը, ուստի հանդիպումը նվիրված է նրա կյանքի ու գործունեության լուսաբանմանը:
Միջոցառմանը մասնակցում են Ն. Աղբալյանի անունը կրող դպրոցի աշակերտներն ու ուսանողական կազմակերպության ներկայացուցիչները:
Զեկուցումով հանդես կգա թանգարանի տնօրեն ՝ Ա. Խորենյանը:


 

Հայ մեծ բանաստեղծ Ավետիք Իսահակյանի տուն-թանգարանը գտնվում է Բաղրամյան պողոտային զուգահեռ գողտրիկ ու խաղաղ Զարոբյան փողոցում: Այս տանը նա ապրել է իր կյանքի վերջին տասը տարին:
Նրա մահից հետո` 1958 թվականին, ՀՍՍՀ Մինիստրների խորհրդի մարտի 1-ի թիվ 67-Պ որոշմամբ Ավետիք Իսահակյանի հիշատակը հավերժացնելու նպատակով առանձնատունը վերածվում է տուն-թանգարանի:

Ավետիք Իսահակյանի տուն-թանգարանի խորհուրդն է պահպանել և նոր սերունդներին փոխանցել այն սուրբ մասունքները և իրեղեն վկայությունները, որոնք կապված են մեծ բանաստեղծի անվան հետ և կրում են նրա արարիչ ձեռքի դրոշմը: Այս հարկի ներքո նա ներկա չէ միայն ֆիզիկապես. Նրա լուսավոր հոգին հավետ այս տանն է, իր ժողովրդի հետ` որպես նրա երթի հավերժ ուղեկից:

Ավ. Իսահակյանի տուն-թանգարանի գործունեության ուղղություններն են` թանգարանի հավաքածուի պահպանումը, հաշվառումը, ուսումնասիրումը, ինչպես նաև մշտական ցուցադրության և ցուցահանդեսների, տարաբնույթ միջոցառումների, դասախոսությունների միջոցով հանրությանը Իսահակյանի գրական ժառանգությանը հաղորդակից դարձնելը:

   
     

Այսօր Ավետիք Իսահակյանի տուն-թանգարանը մայրաքաղաք Երևանի աչքի ընկնող մշակութային օջախներից է, ուր այցելում են հայ և օտարազգի բազմաթիվ մարդիկ: Թանգարանում մշտապես կազմակերպվում են բազմազան ու հետաքրքիր միջոցառումներ` գիտական ընթերցումներ, գրական - երաժշտական ցերեկույթներ, բանավեճեր, գրքերի շնորհանդեսներ, բաց դասեր, համերգներ, ժամանակավոր ցուցահանդեսներ, հանդիպումներ գիտության և մշակույթի անվանի մարդկանց հետ և այլն: Վերջին տարիներին ավանդույթ է դարձել Վարպետի հարկի տակ Ավ. Իսահակյանի անվան դպրոցի առաջին դասարանցիների ‹‹իսահակյանցի›› օծվելու խորհրդանշական արարողությունը, իսկ ուսումնական տարվա վերջին ավարտական դասարանների աշակերտներն այստեղ են ստանում իրենց հասունության վկայականները:
Ամեն տարի թանգարանն ակտիվորեն արձագանքում է նաև Ֆրանսիայի թանգարանների նախաձեռնությանը` մայիսին կազմակերպվող ‹‹թանգարանային գիշեր›› միջազգային ակցիային, որի շրջանակներում Ավ. Իսահակյանի տուն-թանգարանում անցկացվում են տարաբնույթ միջոցառումներ և ցուցահանդեսներ: Միջոցառումներին մասնակցում են բազմաթիվ այցելուներ` տարբեր տարիքի և զբաղմունքի տեր մարդիկ, որոնց համար սովորական օրը դառնում է տոն՝ ընդմիշտ մնալով նրանց հիշողության մեջ:

   ՌԱՎԵՆՆԱՅՈՒՄ

   Արարատի ծեր կատարին
   Դար է եկել, վայրկյանի պես,
   Ու անցել:

   Անհուն թվով կայծակների
   Սուրն է բեկվել ադամանդին,
   Ու անցել:

   Մահախուճապ սերունդների
   Աչքն է դիպել լույս գագաթին,
   Ու անցել:

   Հերթը հիմա քոնն է մի պահ.
   Դու էլ նայիր սեգ ճակատին,
   Ու անցիր...

               1926թ, հունիսի 8, Վենետիկ

Էջի սկիզբ